Æрæфы районы футболон командæ хорз цæттæдзинад равдыста сывæллæтты чемпионаты Хуссар Африкæйы
27.10.2010
15:15

1-æй-3-æм октябрмæ Хуссар Африкæйы цыдис сывæллæтты дунеон чемпионат футболæй, нациты кубок «Данон» рамбулыныл. Архайдта дзы 40 командæйы – сæ бæстæты уæлахиздзаутæ. Æрæфы районы командæ «Ираф» дæр Уæрæсейы чемпионат кæй рамбылдта, уый руаджы сæххæст кодта йæхицæн путевкæ Хуссар Африкæмæ.
Æрыгон футболисттæ уым дæр сæхи æвзæр нæ равдыстой. Рамбылдтой Болгари, Китай, Ног Зеланди æмæ Чехийы командæты, Чили æмæ Бельгиимæ та ахъазыдысты 0:0 хыгъдæй. Фæлæ финалы 1/8-æм хайы Бразилийы командæйæн фæхæрд сты 0:1 хыгъдæй æмæ бацахстой 14-æм бынат.
Таматы Мæирбег, командæ «Ираф»-ы тренер: «Ацы сывæллæттæ хъазынц 3 азы. Сты Уæрæсейы чемпионтæ. Æнæуый турниртæ рамбылдтой, фæлæ ахæм стыр чемпионаты фыццаг хатт архайдтой æмæ сын фæлтæрддзинад нæ фаг кодта. Æндæр сæхи хорз равдыстой, уый зæгъын».
Марат Соколов: «Æрмæстдæр Бразилийымæ уыдис зын, иннæ командæтимæ æнцон уыдис. Зын нæ уыдис, фæлæ нын тæрхонгæнæг хæрам кодта æмæ уый тыххæй фæхæрд стæм».
Командæ «Ираф» сæвзæрд дыууын азы размæ. Ныртæккæ футболисттæ сæ кармæ гæсгæ дих кæнынц 3 къордыл. Æдзух фæархайынц алыхуызон ерысты. Ис сын хорз бæрæггæнæнтæ. Зæгъæм, 2 азы размæ астæуккаг къорды хъомылгæнинæгтæ Францы Нациты кубок «Данон»-ы бацахстой 2-аг бынат.
Чысыл футболисттæм ис стыр тырнындзинад. Фæнды сæ сæ уарзон командæты æмрæнхъ лæууын.
Гуæцæлты Сослан: «Федтон бирæ футболисттæ куыд хъазыдысты уый æмæ мæн дæр афтæ хъазын бафæндыд. Футболмæ уый тыххæй æрбацыдтæн. Мæ зæрдæмæ цæуы командæ «Манчестер Юнайтед», мæ уарзон футболист та у Руни».
Цæрикъаты Зауыр: «Мæ зæрдæмæ цæуы æмæ архайын, цæмæй мын хуыздæр уайа. Ардæм мæ фæндыд. Æмæ загътон, цæмæй æз дæр ардæм æрбацæуон. Уæд æрбацыдтæн æмæ фыццаг тренировкæ мæ зæрдæмæ фæцыд».
Тренировкæтæ кæнынæн æмæ стыр чемпионатты архайынæн хъæуы сæрмагонд уавæртæ æмæ фæрæзтæ. Ацы фарстаты фæдыл футболисттæм æдзухдæр вæййы лæмбынæг цæстдард.
Миндзайты Руслан, спортивон скъолайы директоры хæдивæг: «Дунейы рæстæг аивта, æхцайы уавæр дæр февзæр ис. Тахойты Игорь уæд куыста Цыколайы «Автодор»-ы æмæ сæм уæдæй нырмæ йæ цæст дары. Ныртæккæ сын архайынæн уавæртæ ис мах спортивон скъолайы. Уыимæ ма сæ бон у тренировке кæнын Цыколайы скъолаты дæр. Сæ директортæ сæ уадзынц, æмбарынц сын сæ уавæр. Кæд сын сæрмагонд бынат нæй, уæддæр сæ сæ спортивон залтæм бауадзынц».
Ныр та уал Æрæфы районы футболон командæ йæхи цæттæ кæндзæн турнир «Кожаный мяч»-мæ. Уыдзæнис сæрды.ГТРК «Алания»