Абон 75 азы æххæст кæны зындгонд, адæмæн уарзон режиссер æмæ актер Дзбойты Батырбеджы райгуырдыл. Йæ хæлæрттæ æмæ йæ йе мкусджытæ фырбуцæй хуыдтой Бабле. Ныр къорд азы не хсæн нал ис, фæлæ цæры, йе сфæлдыстадæн ын аргъ чи кæны, уыдоны зæрдæты. Ирыстоны культурон цардмæ Дзбойты Батырбег цы æвæрæн бахаста, уый абарæн ис аивады хъæздыгдæр бынтимæ. Цы кинонывтæ систа, уыдон та алы фæлтæртæн сты уарзон.

Ацы киноныв уарзон кæмæн нæу, æвæццæгæн ахæм адæймаг нæ разындзæн. Адæймаджы зæрдæйы сæвзæры цавæрдæр æхсызгондзинад. Йæ режиссер, Дзбойты Батырбег дзы йæхæдæг дæр сарæзта цымыдисаг фæлгонц. Уæвга, канд ацы кино нæ, Бабле ирон киностудийы рæзтмæ, йæ рæстæджы бахаста алы фæлтæртæ стыр аргъ кæмæн скодтой, ахæм æвæрæн. У ирон адæмы уарзондæр кинотæ «Ах, любовь», «Чегери», «Мужское самолюбие», «Прощай коза и велосипед» æмæ æндæрты рæжиссер.

Йæ курдиат æмæ аивадмæ уарзондзинадæй, йæ алыварс адæмæн хаста æгæрон удæнцойдзинад. Хæларзæрдæ, цæстуарзон, æмгаруарзагæй баззад чи йæ зыдта, уыдоны зæрдæты. Абон йæ хæлæрттимæ хъуамæ бæрæг кодтаид йæ 75 азы юбилей, фæлæ йын уый бæсты мысынц йæ рухс ном.

Кинорежиссер, актер, Цæгат Ирыстоны аивæдты сгуыхт архайæг Дзбойты Батырбег Мæскуыйы каст фæцис Щукины номыл теаралон училищæ. Йе сфæлдыстадон фæндаг райдыдта ирон театрæй. Иу хуызон хорз арæхсти театры æмæ кинойы архайынмæ. Уыд телеуынынады актуалон æмæ мидисджын равдыстыты автор. Баблейы ном чи фехъусы, уый æнæ мидбылбахудгæ нæ фæуыдзæн, уымæн æмæ йæ куысты дæр æмæ царды дæр адæмæн хаста æрмæст циндзинад. Адæмы зæрдæтæм арф бахызтысты цы юмористон нывты архайдта æмæ иста, уыдон. Уæдæ йемæ чи куыста, уыдон ын ныр дæр нæ рох кæнынц, йæ æрмдзæф.

Мæнгæй нæ фæзæгъынц, адæймаг цæрдзæн, цалынмæ йæ хъуыды кæной уæдмæ. Æнæхин, аивад æгæрон уарзтæй чи уарзта æмæ йын удуæлдай лæггад чи кота, ахæм адæймагæй мысынц Баблейы.

Уæвгæ, Дзбойты бинонтæн актеры курдиат æрдзæй лæвæрд у, уымæн æвдисæн йæ хо Зойæ. Адæмæн уарзон актрисæ театр æмæ кинойы сарæзта бирæ цымыдисаг сурæттæ. Баблейы тыххæй дзургæйæ, йæ зæрдæйы сæвзæры иуæй æнкъард, иннæмæй та рухс æнкъарæнтæ.

Баблейæн йæ цард хъыгагæн цыбыр рауад, фæлæ йæ фæстæ цы хъæздыг сфæлдыстадон бынтæ ныууагъта, уыдон бирæйы аргъ сты. Йæ æрмдзæф стъалыйау æрттивы ирон культурæйы историйы.ГТРК «Алания»