Æхсæнадон змæлд «Стыр Ныхас”-ы архайд нæ республикæйы цæрджытæн æнæзонгæ нæу. Сæ размæ цы хæстæ æвæрынц, уыдон сты ахсджиаг æмæ вазыгджын. Сæйрагдæртæ — бахъахъхъæнын адæмы æгъдау, традицитæ, сфæлдыстад. Уæлдай тынгдæр сæ зæрдæ риссы мадæлон æвзагыл, бирæтæ йыл кæй нал дзурынц, ууыл.

Организацийы газет «Стыр Ныхас» дæр арæзт æрцыд уый нысанимæ.

1996 азы 26 январы мыхуыры рацыд газет «Стыр Ныхас”-ы фыццаг номыр. Фæзынд æхсæнадон организаци «Стыр Ныхас”-ы уæды рæстæджы сæргълæууæг Гиоты Михалы хъæппæрисæй. Газетмæ та æрмæджытæ цæттæ кодтой Цомайты Ростислав, Цгъойты Хазби, Уртаты Аланкæ, Чихтисты Тамби æмæ æндæртæ. Уæд организаци æмæ газеты редакци сæ размæ æвæрдтой сæрмагонд хæстæ.

Ууыл рацыд 15 азы. Фæлæ дзы дзæвгар ивддзинæдтæ æрцыд – уый зæгъæн нæй. Куыд фæзæгъынц, цард цæуы, ахсджиаг æмæ риссагдæр фарстатæ та баззайынц æнæ ивгæйæ. Уæвгæ, цыфæнды рæстæг дæр хъæуы фидар хæцын æгъдæуттыл, хъахъæнын мадæлон æвзаг.
Ныртæккæ редакцийы кусджытæ архайынц ууыл, цæмæй газеткæсджытæн сæ æрмæджытæ уой цымыдисаг æмæ зæрдæмæдзæугæ.

2010 азы «Стыр Ныхас» дунеон организаци кæй сси, уый дæр газæты архайдыл æнæфæзынгæ нæ фæци. Сæ размæ сæвæрдтой ног хæстæ, ног нысантæ.

Уæвгæ сын ис бастдзинæдтæ Уæрæсейы æмæ хæстæгдæр фæсарæнты цæрæг ирæтты диаспорæтимæ. Бирæты фæнды газет бакæсын, æмæ йæ рафыссын. Фæлæ уыцы фадат ис æрмæстдæр Ирыстоны æмæ сыхаг регионты почтæйы дæлхайæдты газет рафысгæйæ. Иннæтæй кæй фæнды, уыдоны бон у æрбацæуын редакцимæ æмæ райсын уарзон газеты номыр.

Фæлæ ис иу æхсызгон ногдзинад. Рæстæгимæ æмдзу кæнгæйæ, газет «Стыр Ныхас”-æн байгом кодтой сæрмагонд сайт.

Æмæ хæстæгдæр рæстæг алкæй бон дæр уыдзæн кæмфæнды куы уа, уæддæр кæсын газет электронон хуызы.
Кусджытæ куыд сбæрæг кодтой, афтæмæй бирæтæн ис уарзон рубрикæтæ æмæ редакцийы уæнгтæ архайынц цæмæй иу номерæй-иннæмæ газет уа цымыдисагдæр æмæ хъæздыгдæр. Уый сын кæй бантысдзæн, уый нæ уырны.
Зæгъдзыстæм æрмæстдæр уый, æмæ фæстаг 6 мæймæ йæ тираж фæфылдæр 500 экземпляры.ГТРК «Алания»