15-й Регион. Информационный портал РСО-Алания
Сейчас во Владикавказе
12°
(Облачно)
62 %
3 м/с
$ — 00,0000 руб.
€ — 00,0000 руб.
Ацы азы январæй фæстæмæ пневмококкы ныхмæ вакцинаци хаст æрцыд æнæмæнгæй кæнинаг прививкæты номхыгъдмæ
24.01.2014
22:52

Æнæниздзинадхъахъхъæнынады дунеон организацийы бæрæггæнæнтæм гæсгæ фæстаг азты сырæзт менингитæй, отитæй æмæ пневмонийæ рынчын адæмы нымæц. Уыимæ гæсгæ вакцинацигонд чи рцыд, уыдон дзы рынчын кæнынц 80 % къаддæр. Пневмококкы ныхмæ вакцинаци кæнын кæй хъæуы, уыцы хъуыддагыл Цæгат Ирыстоны дохтыртæ сæмбæлдысты æхсызгонæй.

8-мæйыдзыд Тамерлан раздæр кæд дохтыртæй тæрсгæ кодта, уæд сæм ныр дардæй худын райдайы. Йæ мад Зарина Курлаты ныхæстæм гæсгæ æппæт хъæугæ прививкæ дæр скæнынц. «Уый та уымæн æмæ фыццаджыдæр хъуыды кæнын хъæуы сывæллоны æнæниздзинадыл», — загъта Зарина.

«Ныртæккæ алыхуызон низтæ афтæ бирæ æмæ парахат систы æмæ дæм фыдбылыз кæм æнхъæлмæ кæсы, уый бæрæг нæу. Уæдæ прививкæтæ дæр хуымæтæджы нæ кæндзысты. Зæгъæм нæ сывæллæттæ ницы уæззау æмæ хæцгæ низтæй рынчын уыдысты. Æмæ цæмæй дарддæр ма фæрынчын уой, ууыл архайæм, цæмæй нын æнæниз уой», — загъта Зарина Курлаты

Ныртæккæ национ профилактикон прививкæты къæлиндармæ хаст æрцыдысты æмæ иммунизаци кæнынц 10 инфекцион низы ныхмæ. Се хсæн: хъыпы, гепатит, сырх тæппал низ, хæцгæ хуыфæджы низ, грипп æмæ æндæртæ.

«Прививкæ скæныны размæ æркæсæм сывæллоны медицинон картæмæ. Æмæ кæд исты аиппытæ вæййы, кæнæ истæуыл дызæрдыг фæкæнæм, уæд сбæрæг кæнæм, ацы прививкæ йын скæнæн ис, æви нæ, уый. Пневмококкы инфекцийы ныхмæ прививкæ кæнын кæй райдыдтой, уый дæр хорз у. 2014 азы онг уыд куыд барвæндон уæлæмхасæн прививкæ. Ныр та йæ æнæмæнг кæнын хъæуы се ппæтæн. Æмæ йæ кæндзыстæм. Фæлæ нæм вакцинæ нæма ис», — загъта Будайты Клара, Дзæуджыхъæуы 7-æм поликлиникæйы педиатр.

Прививкæ национ профилактикон прививкæты къæлиндармæ хаст æрцыд Паддзахадон Думæйы закъонмæ гæсгæ. Республикæйы санитарон дохтыртæ дæр уыцы уынаффæимæ разы сты. Æмæ сын хъыг у, адæм ацы прививкæмæ куыдфæндыйы цæстæй кæй кæсынц, уый.

«Зæгъын хъæуы уый, æмæ ныры онг адæм нæма æмбарынц, пневмококк цы зиан хæссы адæймаджы æнæниздзинадæн æмæ цы фæстиуджытæм расайы, уый. Кæсынц æм куыдфæндыйы цæстæй, тæссагыл æй нæ нымайынц. Афтæмæй та у уæззау инфекцион низ. Йæ ныхмæ иммунизаци куы кæнæм, уæд нæ бон уыдзæн эпидемитæ не руадзын», — загъта Отараты Нэлли, Цæгат Ирыстоны фæлхасгæнджыты бартæ хъахъхъæнæг управленийы эпидемиологон цæстдарды хайады хицау.

Цæгат Ирыстоны фæлхасгæнджыты бартæ хъахъхъæнæг управленийы бæрæггæнæнтæм гæсгæ, фæстаг 3 азмæ республикæйы пневмококкæй фæрынчын 100 адæймаджы. Арæхдæр фæзыны уæззау низты фæстæ, сывæллæттæ 5 азы онг æмæ ацæргæ адæм. Уымæ гæсгæ се ппæт дæр хъуамæ лæмбынæг кæсой сæ иммунитетмæ.

Уæрæсейы дохтыртæ кусдзысты 2 хуызы вакцинæтимæ: «Пневмо 23» æмæ «Превенар». Ацы аз сæ хъуамæ сласой республикæмæ. Æлхæд æрцæудзысты федералон фæрæзтæй, иммунизаци та адæмæн кæндзысты – лæвар.
ГТРК «Алания»