15-й Регион. Информационный портал РСО-Алания
Сейчас во Владикавказе
(Снег)
87 %
5 м/с
$ — 00,0000 руб.
€ — 00,0000 руб.
Дзодзыккаты Маргаритæйæн баæгом йæ куыстыты сæрмагонд равдыст
24.06.2011
12:58

Алагиры районы музейон комплексы байгом Дзодзыккаты Маргаритæйы куыстыты дыккаг сæрмагонд равдыст. Фыццаг ын уыдис 2007-æм азы республикон аивæдты хæдзары. Уымæй уæлдай ма архайдта алыхуызон равдыстыты Махачкалайы, Ростовы, Мæскуыйы æмæ æндæр горæтты.

Нывгæнæг æмæ биолог – ацы дыууæ дæсныйады баиу сты иу адæймаджы, Дзодзыккаты Маргаритæйы. Алагиры районы музейон-равдыстадон комплексы байгом ис йæ куыстыты равдыст. Æрбацыдысты йæм йæ хæстæджытæ, йе мкусджытæ æмæ районы сфæлдыстадон интеллигенцийы минæвæрттæ.

Гасынты Жорж, РЦИ — Аланийы адæмон нывгæнæг: «Курдиатджын чызг у, хорз адæймаг. Хорз адæймаг та хорз куыстытæ фæкæны».

Равдыстмæ хаст æрцыд 100 куыстæй фылдæр. Уыдон сты куыд аивадон нывтæ, афтæ алыхуызон æрмæджытыл конд миниатюрæтæ дæр.

Маргаритæйы куыстытæй алкæцыйæн дæр ис йæхи истори. Зæгъæм, ацы нывы равдыста Фыдыбæстæйы Стыр хæсты цаутæ. Скодта йæ йæ мады ныхæстæм гæсгæ.

Маргаритæ ныв кæнын йæ чысылæй фæстæмæ бауарзта. Фæлæ ацы хъуыддагимæ йæ цард сбæтдзæн, уый æнхъæл нæ уыд. Каст фæцис медицинон училищæ, стæй паддзахадон университеты химикон-биологон факультет. У биологон наукæты кандидат, æдасдзинады æмæ экологийы наукæты академийы уæнг. Куыста республикæйы медицинон учреждениты. Ис ын 105 наукон куысты. Ныр 10 азы бæрц та архайы Цæгат Ирыстоны паддзахадон æрдзон фæдзæхст бынаты.

Дзодзыккаты Маргаритæ: «Мæ куыст æмæ мæ нывтæ кæрæдзийæ хицæнгæнгæ не сты. Мæ куыст дæр æрдзимæ баст у, ныв дæр æрдз кæнын. Куы акусын, уæд мæ зæрдæйæн дæр æнцондæр вæййы, стй мын æнтысгæ дæр фылдæр бакæны».

Гуырцъыты Хъасболат, Цæгат Ирыстоны паддзахадон æрдзон фæдзæхст бынаты директор: «Коллективы хсæн нымад у. Кæддæриддæр æм вæййы ног фæндтæ. Архайы сæ царды рауадзыныл. Стæй ма бирæ кусы, цæмæй фæсивæд æрдз хъахъхъæной æмæ аргъ кæной, ууыл».

Ацы равдыст Маргаритæйæн у дыккаг. Афæдзы кæронмæ ма фæнд кæны 2 равдысты бацæттæ кæнын: Цæгат Ирыстоны паддзахадон æрдзон фæдзæхст бынаты æмæ Суададжы астæуккаг скъолайы.
ГТРК «Алания»