Ацы бон историйы бахауд: 1995 азы 21 октябры «Спартак-Алани» сси Уæрæсейы уæлахиздзау футболæй
21.10.2019
13:04
2 697

1995 азы октябры мæйы Уæрæсейы чемпионаты дыууæ туры сыгъзæрин майдантæ рамбулынæн ирон клуб «Спартак-Алани»-йæн иу очко не сфаг. Фæлæ хæрæгсастыл ныфсхаст коллектив ахуыр нæ уыд. 21 октябры мæскуыйаг ЦСКА-йы ныхмæ матчмæ дзæуджыхъæуккаг командæ араст уæлахиз кæнынмæ.

ЦСКА-йы хъазджытæм æндæр фæндтæ уыд, æмæ фыццаг таймы уазджыты сæ разæй скодтой. Фæлæ æрулæфты размæ «Спартак-Алани» цырд контратакæ акодта, æмæ ерысæмбæлттæ ракодтой Сергей Деркачы дуаргæсимæ лæгæй-лæгмæ. Æрдæгхъахъхъæнæг фидар гол бокодта. Дыккаг таймы размæ та Джиоты Инал флангыл стох кодта пуртийыл æмæ йæ Канишевмæ баппæрста. Форварды фидар цæфы фæстæ пурти штангæйыл сæмбæлд æмæ Тедеты Бахвæмæ бахауд. Уыйадыл дзæуджыхъæуккæгты лæбурдтыты раздзог хыгъд сæхгæдта.

Афтæмæй, 1995 азы 21 октябры “Спартак-Алани” фыццаг хатт историйы сси Уæрæсейы чемпион. Уыцы изæр Цæгат Ирыстоны буквалон æгъдауæй “хъуыст уæлахизы салют”.

Уыцы æнтысты кой кæнгæйæ, ахсджиагдæр у зæгъын, 90-æм азты астæу Дзæуджыхъæуы футболæн сæрмагонд бынат кæй уыд. Зæгъæн ис, æмæ Цæгат Ирыстоны нæлгоймаг-цæрджытæ «йæ бæрзонддзинадыл» уæлдай æнувыд уыдысты. Матчты рæстæджы-иу уынгты змæлæг нал уыд. ««Спартак-Алани» уæрæсейаг фæзты канд æвæджиауы хъомыс не ‘вдыста, фæлæ ма æмбисонды тых, уыцы тых адæмы иу кодта, сæ зæрдæтæ сын рухс кодта. Уыцы рæстæджы уый Цæгат Кавказы цæрджытæн уæлдай ахсджиаг уыд, уымæн æмæ адæм фыдæфхæрд уыдысты национ быцæутæ æмæ кæцыдæр политикты тугмондаг амбицитæй. Ирыстоны сæйраг командæ уыд сабыр царды дæнцæг. Йе сконды хæларæй архайдтой алы адæмты минæвæрттæ, уыдон алы матчы дæр æвдыстой иудзинад, стæй ма ирд, лæбурæг футбол. Ахæм командæйы фарс хæцыны тыххæй æмæ йæ архайдимæ экстра-кълассы хъазт феныны тыххæй горæтмæ цыдысты командæйы фарсхæцджытæ сыхаг республикæтæй æмæ Хæдбар Паддзахæдты Цæдисы паддзахадтæй. Нæ командæйы къона кæддæриддæр уыд республикон стадион «Спартак». Йæ реконструкциимæ баст хабар тынг æхсызгон у.

Уæ зæрдыл уын æрлæууын кæнæм, 2020 азы Цæгат Ирыстонæн республикон стадион «Спартак»-ы реконструкцийæн федералон бюджетæй хицæнгонд æрцыд 550 млн сомы, 2021 азы та – 1 млрд 128 млн сомы. Амынд уынаффæ фидаргонд æрцыд æртыццæджы УФ хицауады уынаффæйæ. Дзæуджыхъæуккаг аренæйы реконструкцийы фарст систа республикæйы сæргълæууæг Битарты Вячеслав нæ бæстæйы разамындимæ фембæлдтытæй иуы. Куыстытæ æххæстгонд цæудзысты паддзахадон программæ “Физикон культурæ æмæ спорты рæзт» -ы фæлгæты.

Cтадионы бæстыхайы ныртæккæ ис сывæллæтты спортивон скъола «Спартак-Алани», рог атлетикæйы федераци, йе ‘нæниздзинады гæнæнтæ арæнгонд кæмæн сты, уыцы спортсменты скъола «Стимул». Се ‘ппæт дæр пъланмæ гæсгæ сæ куыст хъуамæ адарддæр кæной.

Хъоцыты Альбинæ