Кусæг дæсныйæдты кад бæрзонддæр кæнынæн 2007 азы республикæйы сæргълæууæг Мамсыраты Таймураз бафыста уынаффæ, æрвылаздæр куыстуæтты хуыздæр фæллойгæнджыты бæрæг кæныны тыххæй.
2010 азы хатдзæгтæм гæсгæ, йæхи хуыздæр чи равдыста, уыдоны кадæн Металлургты галуаны арæзт æрцыд бæрæгбон. Ацы аз къамис куыд сбæрæг кодта, афтæмæй куыстадон къабæзты хуыздæртыл нымад æрцыдысты 8 адæймаджы. Алкæйы фæзминаг куысты тыххæй дæр сæрмагондæй бацæттæ кодтой видеоролик. Фæллойгæнджытæн арфæ кæнгæйæ, республикæйы Сæргълæууæг Мамсыраты Таймураз стыр аргъ скодта, йæ цард куыстадимæ чи сбаста, уыдонæн, уымæн æмæ иннæ къабæзты рæзтæн æнæ къухты фæллойæ уæвæн нæй. Се ‘ппæты дæр Мамсыраты Таймураз схорзæхджын кодта кады грамотæтæй æмæ премитæй.

Цыбырты Георгий,Алагиры районы электрон тых дæттæг куыстуаты мастер: «Хорз чи кусы, уыдонæн се ппæтæн дæр кад скæнынц, æмæ ахæм æрхъуыдыдзинад хорз у, æгайт-ма ахæм хорз хъуыддæгтæ æрхъуыды кæнынц. Сæ цæрæнбон бирæ нæ хицауадæн. Фæсивæд афтæмæй хуыздæр райы куыстмæ».

Сиукъаты Петр, акционерон æхсæнад «РусГидро»-йы слесарь: «Хорз уаид,нæ фæсивæд куы цæуид кусынмæ. Ныртæккæ дæр нæм æрыгæттæ ис, фæлæ зæронд адæм уæддæр фылдæр сты».

Хуыздæрты ном райсыныл ма архайдтой 17 адæймаджы. Уыдон сты промышленносты, хъæууон хæдзарады, арæзтады, энергетикæйы, цæрæнæутты-коммуналон хæдзарады, бастдзинады æмæ фæндæгты арæзтады кусджытæ. Алкæмæн дæр сæ къабæзты ведомствоты разамонджытæ саккаг кодтой хæрзиуджытæ. Уæлдай æхсызгон та уыд æрыгон фæсивæды арфæ – уыдон сты 7-м профессионалон училищейы ахуырдзаутæ. Фидæны специалисттæ зæрдæ бавæрдтой, хистæрты æнтыстдзинæдтæм кæй тырндзысты, уымæй.ГТРК «Алания»