Йæ феныны фадат уыдзæн алкæмæн дæр. Ирыстойнаг нывгæнджытæ æмæ скульптортæ сæ куыстытæ равæрдзысты регионты экспозицийы. Байгом уыдзæн Сочийы Олимпаг парчы равдыстыты центры. Национ куклатæ, скульптурæтæ æмæ уæлæдарæсæй дарддæр дзы Олимпиадæйы уазджытæ фендзысты зындгонд хуызисджытæ Басаты Хъазыбег, Быгъуылты Алан æмæ Владимир Майоровы куыстытæ. Цæгат Ирыстоны культурæйы æмæ дзыллон коммуникациты министрады зæгъынц, стыр куыст кæй бакодтой, уый. Уымæн æмæ равдыст саразджытæм уыд карз домæнтæ.

Фыццаг уал скæнынц телæй каркас. Уый вæййы куклайы бындур. Стæй сабыргай райсы бæлвырд формæ. Нывгæнæг Дзиуаты Земфирæмæ ис йæхи авторон технологи. Алы кукла скæныныл дæр цæуы бирæ рæстæг, фæхъæуы йыл зæрдиагæй бакусын. Цæттæ куысытæн аргъ скæныны фадат уыдзæн Сочийы Олимпаг хъæзтыты архайджытæн æмæ уазджытæн дæр. Земфирæйы композици «Зæронд горæты нывтæ» æрвыст æрцыдысты зымæгон хъæзтытæ кæм цæудзысты, уырдæм. Куклатæ сæ бынат бацахсдзысты регионты экспозициты хсæн.

Скульптор Зæнджиаты Таймуразы сфæлдыстадон ахаст та у, бынтон æндæр хуызон. Уый композицитæ дæр фендзысты Сочийы уазджытæ. Фидæны куклайы бындур ын вæййы пластилинæй конд. Уый фæстæ йæ райдайы йæхи технологимæ гæсгæ кæнын. Куклайæн йæ алы уæнг дæр фæкæны змæлгæ. Фæстагмæ йын авгæй скæны цæстытæ, парик. Таймураз стыр æргом здахы национ уæлæдарæсы æууæлтæм. Алы куклайæн дæр вæййынц фыдæлты культурæ æмæ æгъдæуттимæ баст. Бахуыйынц сæ Годжыцаты Изольдæйы къухдæстнытæ. Цæттæ куклатæ вæййынц æмбал кæмæн нæй, ахæм аивадон куыстæтæ. Алкæмæн дæр дзы хицæн бакаст, æмæ характер.

Ирон æрмдæсныты компазицитæ равæрдзысты Сочийы Олимпаг парчы равдыстыты центры. Цæгат Ирыстоны культурæ æмæ дзыллон коммуникациты министрады куыд зæгъынц, афтæмæй сæ бацæттæ кæнын æнцон хъуыддаг нæ уыди. Равдыст аразджытæм уыди карз домæнтæ. Фæлæ «Изольдæйы» æмæ Зæнджиаты Таймуразы национ куклатæ æмæ костюмтæ, скульптор Джуба Хетагурийы сфæлдыстад, Дзиуаты Земфирæйы композицитæ нымад æрцыдысты аккагыл. Сочийы Олимпаг хъæзтытæ хъæздыг уыдзысты аивадон цаутæй дæр. Ирон адæмы культурæ дзы æвдисдзысты æрмæст адæмон аивадон æрмдæснытæ нæ, фæлæ сфæлдыстадон къордтæ дæр. 22-æм зымæгон хъæзтыты алы фæзты кусдзысты Дзанайты Ольгæйы зарæггæнджыты къорд, ансамбльтæ «Дети гор», æмæ «Ритмы гор», зарæггæнæг Виктория Бабаева. Уымæй уæлдай республикæйы экспозицимæ хаст æрцæудзысты Басаты Хъазыбеджы, Бигъуылаты Аланы æмæ Владимир Майоровы хуызистытæ.ГТРК «Алания»