Цы курдиæттæ балæвæрдтой, уыдон фаронимæ абаргæйæ сты цалдæр хатты фылдæр. Цæрджытæ рады лæууынц сахатгай. Приватизаци лæвар скæныны закъон Уæрæсейы ис 20 азæй фылдæр. Фæлæ уæддæр, цавæрдæр аххоссæгтæм гæсгæ, лæвар нæ рауайы. Уыцы рæстæгмæ адæм сæхиуыл скодтой муниципалон цæрæнуæтты 70%. Ацы закъонæн йе «мгъуыд адарддæр кодтой дыууæ хатты. Афтæ бакодтой ныр дæр. Сæ цæрæнуæттæ лæвар приватизаци скæнын афоныл сæ къухы нæ бафтыд æфсæддонтæн æмæ æнæ ныййарджытæй чи баззад, ахæм сывæллæттæй бирæтæн.

Дыууæ азы дæргъы Уæрæсейы хицауад араздзæн сæрмагонд гæнæнтæ ацы адæмæн хæдзæрттæ дæттынæн, æмæ йын бацæттæ кæндзысты закъондæттæг бындур. Эксперты хъуыдымæ гæсгæ, приватизацийы ис, хæдзæртты хицæуттæн пайда чи нæу, ахæм хъуыддæгтæ дæр, уымæн æмæ сын паддзахад фæнд кæны, сæ хъалонтæ фæфылдæр кæнын. Хæдзæртты бындурон цалцæг дæр гæнæн ис, æмæ æрæнцайа цæрджыты уæхсчытыл. Ахæм хæрдзтæ кæнын кæй нæ фæнда, уымæн йæ бон уыдзæн приватизацигонд фатер горæты исбонмæ радтын. Цæрæн та дзы уыдзæн, цыма социалон æгъдауæй æххуырст фатер у, ахæм уавæры. Уæд та фатер ауæй кæныны, кæнæ йæ хæстæджытæй искæмæн ныууадзыны фадат нæ уыдзæн.ГТРК «Алания»