Суададжы ацыд конкурс “Ирон чызг, дæ фарн бирæ”
09.03.2011
16:01

Фыдæлты æгъдæуттæ бахъахъхъæнын у æрыгон фæлтæры сæйраг хæс. Уымæ гæсгæ сыл сывæллæтты ахуыр кæнын хъæуы чысылæй фæстæмæ. Ацы хъуыддагыл сæрмагондæй архайынц нæ республикæйы скъолаты дæр. Уымæн æвдисæн у, Суададжы ахуыргæнджыты коллектив цы мадзал бацæттæ кодтой, уый.
«Ирон чызг, дæ фарн бирæ». Ахæм конкурс ацыд Суададжы культурæйы хæдзары. Бацæттæ йæ кодта хъæуы скъолайы ахуыргæнджыты коллектив. Мадзал цыдис ирон æвзагыл. Йæ номинацитæ дæр баст уыдысты националон традицитимæ.
Санайты Альбинæ, Суададжы астæуккаг скъолайы ирон æвзаг æмæ литературæйы ахуыргæнæг: «Фарон ма ирон æвзаджы бонмæ ерыстæ арæзт æрцыд лæппуты хсæн ирон æгъдæуттæй. Уым архайдтон мæ ахуырдзауимæ æмæ мæм сæвзæрд хъуыды, чызджыты хсæн дæр ахæм конкурс саразын. Нæ ныры дуджы мæнгидеалтæ æрыгон фæлтæрыл куыд æвзæр ахадынц, уый уынгæйæ мæ бафæндыд, цæмæй нæ чызджыты хсæн дæр ахæм ерыстæ арæхдæр цæуой».
Конкурсы архайдтой Алагиры районы скъолаты ахуырдзаутæ. Æдæппæтæй 9 чызджы. Конкурс сын стыр ахъаз фæцис. Хуыздæр базыдтой нæ фыдæлты æгъдæуттæ, уыимæ ма сын фæзынд ног хæлæрттæ дæр.
Айларты Зæлинæ, Хæтæлдоны астæуккаг скъолайы ахуырдзау: «Ацы конкурсмæ æз цæттæ кодтон иу мæйы бæрц. Æххуыс мын кодта мæ ахуыргæнæг Æгкацаты Жаннæ. Базыдтон бирæ ног ирон æгъдæуттæ æмæ дарддæр дæр архайдзынæн, цæмæй ноджы фылдæр базонон, ууыл».
Кцойты Зæлинæ, Дзуарыхъæуы астæуккаг скъолайы ахуырдзау: «Æз дæн Дзуарыхъæуы скъолайы ахуырдзау. Конкурсы архайын 1-аг хатт. Мæ зæрдæмæ тынг фæцыдис. Мæхицæн ног традицитæ базыдтон».
Конкурсы уыдис 5 номинацийы. Жюрийы уæнгтæ архайджытæн бæрæг кодтой се ддаг бакаст, аив ныхас, сæ музыкалон æмæ кулинарон арæхстдзинæдтæ.
Айларты Габе, жюрийы уæнг: «Ацы хъуыддаг арæхдæр куы еæной, уæд нæ фæсивæд кæсдзысты æмæ сæ арæхстдзинад, сæ уæздандзинад, сæ алы хъуыддаг дæр уыдзæн рæсугъддæр. Уыцы хъуыддаг куыд æвдисой æрмæст Суададжы нæ, фæлæ Ирыстоны алы хъæуы дæр, Хуыцау ахæм амонд ракæнæд».
Конкурсы хатдзæгтæм гæсгæ 1-аг бынат бацахста Црауы астæуккаг скъолайы ахуырдзау Æлборты Светланæ, 2-аг – Рæмонты Мæдинæ Мызурæй, æртыккаг бынаты та уыдис Хæтæлдоны скъолайы минæвар Айларты Зæлинæ.ГТРК «Алания»