15-й Регион. Информационный портал РСО-Алания
Сейчас во Владикавказе
(Облачно)
63 %
0.41 м/с
Цæгат Ирыстоны æрхъуыды кодтой Джыккайты Шамилы ном
25.02.2020
18:32
738
Цæгат Ирыстоны æрхъуыды кодтой Джыккайты Шамилы ном

Дзæуджыхъæуы æрхъуыды кодтой Джыккайты Шамилы ном. Йæ уарзон уæлдæр ахуыргæнæндоны – Цæгат Ирыстоны Хетæгкаты Къостайы номыл паддзахадон университеты – фыссæджы 80 азы бон æрæмбырд сты йæ хæстæджытæ, æмбæлттæ, æмкусджытæ, студенттæ æмæ ногæй æрхъуыды кодтой, куыд курдиатджын æмæ диссаджы адæймаг уыд юбиляр, уый.

«Абоны хуызæн æй хъуыды кæнын, Шамилы сфæлдыстадимæ куыд базонгæ дæн, уый. Уæд ахуыр кодтон педагогон институты историон-филологон факультеты, уыцы иу рæстæг ма куыстон газет «Молодой коммунист»-ы. Иу бон газеты редактор тетрады сыфимæ æрбахызт, уым уыдысты уæд нырма æнæзонгæ поэты æмдзæвгæтæ, сæ быны фыст – Джыккайты Шамил. Уый фæстæ нæм редакцимæ æрбацыд æмæ нын æй бацамыдтой куыд æвзонг Пушкин кæнæ Къостайы. 3ый фæстæ йæ фæндаг байгом канд махмæ нæ, фæлæ æндæр рауагъдадтæм дæр. Ам ректорæй кусын куы райдыдтон, уæд нæм ирон филологийы факультет хицæнæй нæ уыд, уыцы хъуыддаг мах сраст кодтам, нæ фарсмæ та уыд Шамил, уый бирæ хъару, зæрдæйы хъарм бавæрдта, цæмæй ирон филологийы факультет раразмæ уа», – раргом кодта йæ мысинæгтæ Мæхæмæтты Ахуырбег.

Мысæн мадзалы фæлгæты ирон филологийы факультет бацæттæ кодта равдыст Джыккайты Шамилы царды алы периодты къамтимæ, кæсджытæ æрхъуыды кодтой поэты цардафыст, йе сфæлдыстад, раргом кодтой сæ хъуыдытæ фыссæджы ном сæнусон кæныны тыххæй.

«Абон мах кад кæнæм æцæг зындгонд поэт, драматург, прозаик, публицист, тæлмацгæнæг, зынгæ æхсæнадон архайæг Джыккайты Шамилæн. Уый райгуырд йæ Фыдыбæстæйæн лæггад кæнынæн, уый та уыцы иу рæстæг стыр кад дæр у æмæ егъау уæз дæр. Шамил никуы загъта, уæззау кæнæ йын зын у. Уый куыста æмæ æнæзивæгæй лæггад кодта йæ адæмæн, мадæлон æвзагæн æмæ æппæт Ирыстонæн. Ирон литературæйы хæзнадонмæ цы æвæрæн бахаста, уымæн аргъгонд нæма ‘рцыд, саргъ кæнын ын хъæуы. Мæ нымадæй, æрцыд рæстæг йæ уацмысты æххæст æмбырдгонд рауадзынæн. Уый суыдзæн ноджы иу къахдзæф Джыккайты Шамилы ном сæнусон кæныны хъуыддаджы. Абоны боныл æнкъарддзинад æфтауы йæ трагикон мæлæт. Фæлæ уæддæр гуырæн бон æнкъард, фæлæ бæрæгбон у», – загъта газет «Рæстдзинад»-ы сæйраг редактор Хозиты Барис.

Уæ зæрдыл уын æрлæууын кæнæм, Джыккайты Шамил у уæрæсейаг æмæ ирон ахуыргонд, поэт, æхсæнадон архайæг. Æхсæз поэтикон æмбырдгонды, æртæ пьесæйы, фольклор, ирон литературæйы истори æмæ поэтикæйы актуалон фæрстытыл фыст бирæнымæц монографитæ æмæ зонадон-критикон уацты æмбырдгæндты автор. Поэт æвирхъау хуызы йæ цардæй ахицæн 2011 азы 26 майы.

 

Хъоцыты Альбинæ; къамтæ: ЦИПУ-йы пресс-службæ