Беслæны райдыдта 1 скъолайы спортзалы агъуысты алыварс конд мемориалон зæппадзы реставрацийыл куыст. Ацы хабар дыццæджы “15-æм Регион”-æн фехъусын кодта Рахизфарсы районы бынæттон хиуынаффæйады администрацийы сæргълæууæджы хæдивæг Мырыкъаты Хъазыбег. Ивгъуыд къуырийы Интернеты иугонды фæзындысты нывистытæ, бæрæгæй сыл зыны, уæлхуыды сыфтæ хайгай кæй фæтасыдысты æмæ ранæй-рæтты сæ хæцæнтæй кæй фæиппæрд сты. Хъуыддаг йæхи цæстæй чи федта, уыдон дисы бафтыдысты, мемориалы уæлхуыд куыд тагъд фехæлд, афтæмæй йын йæ проект фæсарæйнаг компани бацæттæ кодта.

“Хъыгдард баййæфта мидæггаг алюмин уæлхуыд. Специалисттæ йыл кусын райдыдтой. Знон æй райхæлдтой, бамбæрстой, баивын дзы цы хъæуы, уый, æмæ ныртæккæ агурынц хъæугæ лыстæг хæйттæ. Сæйрагдæр у, уæлхæдзар æнæхъæн кæй у, ницы дзы хъары, ацы лыстæг хъæнтæ та цыбыр рæстæгмæ аиуварс кæндзыстæм”, – радзырдта Хъазыбег. Йæ нымадæй, ацы фарст боныхъæды тыххæй сæвзæрд. “Бæлвырд аххосаг сбæлвырд кæнын зын у, фæлæ уæддæр  нæ зæрдæ тынгдæр дымгæмæ æхсайы. Уæлхуыд уый аххосæй фæтасыд æмæ æрзæбул”, – йæ ныхасмæ бафтыдта Мырыкъаты Хъазыбег.

“Беслæны мадæлты” комитеты сæрдар Дудиаты Сусаннæйы хъуыдымæ гæсгæ, мемориалы уæлхуыд хъыгдард баййæфта, æрæджы электрон хæтæл куы ивтой, уæд. Фæлæ кусджытæ сæ архайды фæстиуджытæ конструкцийы хицæндзинæдты тыххæй нæ аиуварс кодтой.

“Уæлхæдзар хорз уавæры ис, фæлæ ацы хъуыддæгтæн сæ фæстиуджытæ хорз нæ уыдзысты. Уый аххосæй конструкци æнæхъæнæй куы фæтаса, уæд, Хуыцау бахизæд, уæлхуыды лыстæг хай искæй сæрыл æрхаудзæн. Уымæ гæсгæ, цалынмæ уавæр критикон нæма у, уæдмæ йæ сраст кæнын хъæуы. Эстетикон æгъдауæй дæр йæ хуыз зæрдæмæдзæугæ нæу. Районы администрацимæ баздæхтыстæм. Бамбарын нын кодтой: хъæнтæ аиуварс кæнынæн сæрмагонд æрмæг хъæуы – немыцаг фирмæйы амындæй мемориалон зæппадз æппæты фыццаг кæмæй æрæмбæрзтой, уыцы сæрмагонд æмтад. Фæлæ нын зæрдæ бавæрдтой, æввахс рæстæджы алцыппæт дæр уагмæ кæй æркæндзысты, уымæй”, – фæбæрæг кодта Дудиаты Сусаннæ. Уымæй уæлдай ма ивд æрцæудзысты мемориалы бæстыхайы бандæттæ дæр.