Цæгат Ирыстоны сæргълæууæг Битарты Вячеслав раарфæ кодта Абхазы сæргълæууæг Рауль Хаджимбайæн, республикæйы президенты хæсады кæй бацыд, уый фæдыл. Чиновникы инаугурацийы мадзал уыд æртыццæджы Сухумы.

“Арфæ дын кæнын, Абхазы Республикæйы Президенты бынатмæ дыккаг хатт æвзæрст кæй æрцыдтæ, уый фæдыл! Адæм дыл ногæй æмхуызонæй кæй схъæлæс кодтой, уый у æцæг раздзоджы, кадджын æмæ фæлтæрдджын разамонæджы, йæ Фыдыбæстæ æмæ иубæстон адæмы дарддæры хъысмæты бæрн йæхимæ райсынмæ цæттæ иузæрдион патриоты бæрзонд авторитеты æвдисæн.

Махæн, Цæгат Ирыстонæн, тынг æхсызгон у зонын æмæ хъус дарын, Абхазы Республикæ уæндонæй рæзты фæндагыл куыд цæуы, социалон-экономикон хæрзвадаты фæрстытæ разæнгардæй куыд скъуыддзаг кæны, адæмы цард фæхуыздæр кæнынæн æппæт хъæугæ мадзæлттæ куыд æххæст кæны. Ацы æнтыстыты фылдæр хай, кæй зæгъын æй хъæуы, – дæ куырыхон æмæ дардмæуынаг уынаффæты руаджы.

Мæ зæрдæ дын зæгъы фылдæр æнтыстытæ ацы фæндагыл! Фидар æнæниздзинад, æнувыд æмбæлттæ æмæ æмкусджытæ, æппæт нысангонд пълæнтты сæххæст Абхазы пайдайæн!” – загъдæуы арфæйы ныхасы.