Йæ 95 азы юбилей сбæрæг кодта Гиоты Нинæ
10.03.2011
15:05

Царды бирæ зындзинæдтæ бавзæрста, фæлæ фæсмон ницæуыл кæны. Æдзух йæ уæлхъус æрбалæууынц йæ бирæ цот. Æмæ йын царды уымæй ахсджиагдæр ницы ис. Гиоты Нинæйæн 8-æм мартъи у дывæр бæрæгбон – фæбæрæг кæны сылгоймæгты бон æмæ йæ гуырæн бон. Ацы аз та ма йыл сæххæст 95 азы. Уарзон нанайæн раарфæ кæнынмæ æрæмбырд сты йæ цот, йæ цоты цот æмæ уыдоны хъæбултæ. Нинæйæн уый алы хатт дæр тынг æхсызгон вæййы.
Райгуырæн хъæу Регахы Нинæйæн ацыд йæ царды фылдæр хай. Райста ахуырад æмæ райдыдта сывæллæтты кæсын æмæ фыссыныл ахуыр кæнын. Фыдыбæстæйы Стыр хæсты рæстæг дæр нæ ныууагъта йæ куыст. Йæ царды бирæ зындзинæдтæ бавзæрста. Æххæстæй банкъардта хохаг хъæуы уæззау цард.
Нинæ схъомыл кодта 6 сывæллоны. Йæ цоты цот сты 15, уыдоны цот та 14. Йæхæдæг куыд зæгъы, афтæмæй бирæ кæй цæры, уый у сыгъдæг уæлдæф æмæ йæ æвæллайгæ куысты руаджы. Хæсты фæстæ сылгоймаг архайдта колхозы хъугдуцæгæй. Йæ хорз куысты тыххæй йæ схорзæх кодтой фæллойы ветераны майданæй.ГТРК «Алания»