Кировы районы, Цæгат Ирыстоны æппæт бæстыхайау, æххæстгонд цæуы адæмы вакцинаци коронавирусон инфекцийы ныхмæ. Районы æрвылбон фылдæр кæны, коронавирусæй прививкæтæ чи скодта, уыцы адæмы нымæц. Ацы хабар программæ «Бынæтты» эфиры фехъусын кодта бынæттон хиуынаффæйады администрацийы сæргълæууæг Батиаты Хъазыбег.

«Адæмы æнæниздзинад æппæты сæйрагдæр у, æмæ йæм æнæмæнг хъус дарын хъæуы. Кусæм вакцинацийы фарстыл, хатæм нæ цæрджытæм, æвдисæм нæхи дæнцæгæй. Куыст цæуы, фæлæ хорз уаид, разæнгарддæрæй куы цæуид. Æрвылбон фылдæр кæны, прививкæтæ чи скодта, уыцы адæмы нымæц», — загъта уый.

Уымæй уæлдай, Батиаты Хъазыбег куыд фæбæрæг кодта, афтæмæй Кировы районы æппæт цæрæн пунктты арæзт æрцыдысты ног фельдшерон-æвгъæддонон пункттæ. Абоны бон ма бындурон хуызы цалцæг кæнинаг у сæйраг районы рынчындон.

«Нæ сæйраг районы рынчындон бындурон хуызы цалцæг кæнинаг у. Ныртæккæ амынд фарстыл кусынц арæзтады министрад æмæ æнæниздзинад хъахъхъæнынады министрад. Уыдон цæттæ кæнынц проектон-хыгъдон документаци, æмæ нацпроект «Æнæниздзинад хъахъхъæнынад»-ы руаджы махæн фæуыдзæн фадат нæ рынчындонмæ æмæ бындурон хуызы цалцæг кæнинаг хайæдтæм хъусдард æххæст кæнынæн», — хатдзæг скодта уый.