Уыцы фарстайӕн йӕ дзуапп уӕлӕнгай нӕу. Арф ыл хъӕуы ахъуыды кӕнын.

Фыццаджыдӕр, кувгӕ цӕмӕн кӕнӕм, цы нысанимӕ? Уырны нӕ ис Дунесфӕлдисӕг ӕви йӕм ӕрмӕстдӕр этикеты хуызы рӕсугъд ныхӕстӕй “кувӕм”? Уыцы кувыны хъуыддаг, абоны царды уавӕртӕм гӕсгӕ, нӕхицӕн ӕнцондӕр ӕмӕ ӕхсызгондӕр кыд у, афтӕ ивӕн ис?

Фидарӕй зӕгъын: “Нӕй!” Уымӕн ӕмӕ Хуыцаумӕ кувынимӕ баст ӕгъдӕуттӕй ӕмӕ сӕ мидисӕй иуварс иунӕг къахдзӕф дӕр кӕнӕн нӕй. Нӕй сӕ ивӕн царды цыд ӕмӕ нӕ уавӕртӕм гӕсгӕ. Ӕнусон сты, цӕуынц нӕ рагфыдӕлты монон зонындзинӕдтӕй, сӕ дунембарынадӕй. Нӕхимӕ гӕсгӕ сӕ куы ивӕм куыд ӕнцондӕр у, афтӕ, уӕд нӕ иннӕ ӕгъдӕуттӕ, нӕ национ фарстатыл ныхас, нӕ архайды ницыуал нысан уыдзӕн. Уӕд сӕ иууылдӕр ферох кӕнын хъӕуы ӕмӕ нӕхи иннӕ адӕмтыл ныффыссӕм.

“Хуыцау нӕ сфӕлдыста ӕмӕ алцыдӕр Хуыцауӕй аразгӕ у”- фӕзӕгъы алчидӕр. Кувгӕйӕ, йемӕ  ӕргомӕй комкоммӕ дзургӕйӕ, равдисӕм, цы зӕрдӕ йӕм дарӕм, табу йын кӕнӕм. Уыцы куывдӕй райдайы алцыдӕр. Ӕмӕ нӕхицӕн куыд ӕнцондӕр, куыд ӕхсызгодӕр у, афтӕ куы кӕнӕм, уӕд уымӕй Хуыцауы ӕфхӕргӕ кӕнӕм, кувынӕн аргъ кӕй нӕ кӕнӕм, уый ӕвдисӕм. Нӕ куывд ӕм нӕ фӕхӕццӕ уыдзӕн, нӕхи та сайгӕ кӕнӕм.

Кӕд нӕ фыдӕлты бирӕ фӕлтӕртӕ кувынмӕ тынг лӕмбынӕг цӕттӕ кодтой, кӕд куывтой сӕ хоры хуыздӕрӕй, кӕд нывонд уӕныгмӕ афӕдзы дӕргьы сӕрмагондӕй зылдысты,  кӕд сылгоймаг йӕ кӕрдзынтӕ кодта сыгьдӕг зӕрдӕйӕ, комбастӕй, ӕнӕдзургӕйӕ, уӕд уый ууыл дзурӕг у, ӕмӕ уыцы Хуыцаумӕ куывды стыр нысан ӕмӕ тых ис. Нӕ уынгӕг материалистикон зонындзинӕдты бындурӕй йӕм ма кӕсӕм. Дунесконды уыдон рыджы молекулӕйы бӕрц дӕр не сты.

Ныр сӕдӕ азӕй фылдӕр рацыд, уыцы мидистӕ рох кӕнын куы райдыдтой, уӕдӕй. Уымӕн ис бирӕ аххосӕгтӕ. Ӕз сыл ацы ран нӕ дзурын. Цы уыдис, уый мах бар нал у. Цы уыдзӕн, ууыл хъӕуы хъуыды кӕнын. Ӕмӕ уый та махӕй аразгӕ у. Цы байтауӕм, цы радтӕм кӕстӕртӕм, уый уындзыстӕм фидӕны.

Хуыцаумӕ кувынмӕ хуымӕтӕг цӕстӕнгасӕй кӕсӕн ницы хуызы ис. Монон дуне (духовный мир) хӕрын ӕмӕ нуазынимӕ баст нӕу. Ӕгъдӕуттӕн дӕр сӕ монон мидистӕ хъӕуы уынын. Уыдон царды цыдимӕ нӕ ивынц.

Кӕд Хуыцаумӕ ӕлхӕнгӕ чъиритӕй ис кувӕн, уӕд цӕхӕраджынтӕй ӕмӕ картофджынтӕй дӕр райдайӕм кувын. Цы уӕлдай ма нын у? Бирӕтӕм хӕбизджынтӕй хӕрзаддӕр куы кӕсынц. Уӕд нӕ чындзӕхсӕвты ӕххуырсгӕ “хистӕртӕн” дӕр “еблагъуа” зӕгьӕм. Кӕд исчи афтӕ хъуыды кӕны, ӕмӕ хӕдзары цӕмӕй-фӕнды дӕр ис скувӕн, уӕд рӕдийы. Хуыцау уыны алцыдӕр ӕмӕ алкӕйы дӕр. Уый ахӕм куывдӕй нӕ асайдзыстӕм. Хӕдзары бинонтӕн “ассорти” кӕрдзынтӕ куы балхӕнай, уӕд уыдон ӕрмӕстдӕр хӕринаг сты. Ӕнӕмӕнг дзы кувын нӕ хьӕуы, ӕмӕ нӕхимӕ фыдӕх ма исӕм.

Хуыцаумӕ ӕрмӕст рӕсугъд дзыхы ныхасӕй, водкӕйӕ, ӕлхӕнгӕ чъиритӕ ӕмӕ фӕрсчытӕй чи “кувы”, уый у атеист, ӕмӕ куы нӕ кува, уӕд йӕхицӕн дӕр ӕмӕ адӕмӕн дӕр хуыздӕр у.

Бирӕтӕ зӕгъынц, абоны уавӕрты уӕддӕр алцы ӕлхӕнгӕ кӕнӕм, цы уӕлдай ма дзы ис? Уый афтӕ у.

Фӕлӕ ссад, цӕхх, цыхт, нӕлхӕ сӕхӕдӕг кувинӕгтӕ не сты. Рагацау ӕлхӕд куы уой ӕмӕ хӕдзары Фарнӕй куы фӕхъӕстӕ уой, уӕд хуыздӕр. Фӕлӕ дзы кувинӕг ӕртӕ чъирийы рауайы ӕрмӕст сыгъдӕгзӕрдӕ фӕлмӕн сылгоймаджы къухты. Уый бауадзы Фарн уыцы кувинӕгты, уый сӕ ӕрӕвӕры цӕттӕйӕ фынгыл.

Уӕдӕ бойняйы фыдмард цы гал акӕнынц, ӕмӕ тагъд-тагъд конвейерау, туджы мӕцгӕ кӕй ахӕйттӕ кӕнынц, йӕ уӕнгтӕ йын алыхуызон хъуыддӕгтӕн кӕмӕн ауӕй кӕнынц, уый дӕр кувынӕн нӕ бӕззы. Фыс, кӕнӕ уӕныг куы балхӕнынц, хӕдзары йӕ ӕмбӕлгӕ ӕгъдауыл, Хуыцаумӕ скувгӕйӕ, цӕхх ын адаргӕйӕ, куы акусарт кӕнынц, ӕмӕ йӕ куы сфыцынц, уӕд свӕййы кувинаг. Уый гӕнӕн куы нӕ уа, уӕд ӕлхӕнгӕ фӕрсчытӕ ис ӕвӕрӕн фынгыл ӕрмӕстдӕр хӕринаджы хуызы, скувыны фӕстӕ.

Нӕй Хуыцаумӕ кувыны Ӕгъдауы чысыл, кӕнӕ аппаринаг хъуыддӕгтӕ. Кӕнӕ йӕм зӕрдӕйӕ кувӕм, кӕнӕ нӕ. “Кӕд Хуыцау ис, уӕд нӕ йӕ хорзӕх уӕд” – тынг ӕнӕмбаргӕ ныхас у. Е.Евтушенко куыд фыста, афтӕ “… но быть нельзя чуть-чуть распятым.” Цӕстмӕмитӕн ӕмӕ сайӕн ныхӕстӕн дзы бынат нӕй.

Нарт фесӕфтысты, кувгӕ кӕй нал кодтой, Хуыцауимӕ Сырдоны ардыдӕй тох кӕнынмӕ кӕй схъавыдысты, уый тыххӕй. Ӕмӕ цӕй мидӕг уыдис уыцы тох, хӕцӕнгӕрзтӕ йӕм, мыййаг, куы нӕ райстой? Ӕгӕр кӕй схъал сты, царды бӕрц ӕмӕ Ӕгъдау кӕй нал зыдтой, Хуыцаумӕ кувгӕ кӕй нал кодтой, уый мидӕг.

Акӕсут уӕ алыварс ӕмӕ фендзыстут, мах дӕр уыцы уавӕрмӕ хӕстӕг кӕй стӕм, стӕй нӕм зыгъуыммӕ зондыл ардауӕг сырдонтӕ дӕр кӕй сбирӕ сты. Кӕстӕрты уыдонӕй бахизӕм, радтӕм сӕм зонындзинӕдтӕ ӕмӕ Ӕгъдау сыгъдӕгӕй. Цӕстмӕмитӕй дзаг ӕмӕ лакъонимӕ змӕстӕй йӕ нӕ айсдзысты.

Хуыцау нӕ йӕхимӕ ӕрбахӕстӕг кӕнӕд ӕмӕ нӕ Нарты сӕфтӕй бахизӕд!