Уый размæ куыд хъусын кодтой, афтæмæй Турчы ирон диаспорæ бакодта гуманитарон æххуыс йæ историон Фыдыбæстæйæн. Æрвыст æрцыдысты хъахъхъæнынады фæрæзтæ — 10 мин медицинон маскæйы, цыппар мин хъахъхъæнынадон костюмы, æртæ мин респираторы. Турчы цæрæг ирæтты æхсæнад «Алани»-йы сæрдар Хъуысаты Садреттин йæ раныхасы «15-æм Регион»-æн куыд фæбæрæг кодта, афтæмæй амынд мадзал æххуысыл нæ нымайынц, фæлæ сæ хæсыл се ‘фсымæрты раз.

«Æххуыс, уый сыхаг кæнæ зонгæйæн цавæрдæр уæззау уавæры куы баххуыс кæнай, уый у. Фæлæ уæззау уавæры дæ мад, де ‘фсымæр, дæ хо куы уой, уæд уый æххуыс нæу, фæлæ дæ хæс. Куы йæ сæххæст кæнай, уæд хорз, кæд нæ, уæд та æгаддзинад. Кæд дард цæрæм, уæддæр нæхи Ирыстоныл нымайæм, иу туг, иу стæг стæм. Уымæ гæсгæ уый æххуыс нæу. Ирыстоны рынчынтæ куы нæ уаид, æмæ æндæр сыхаг республикæтæн куы баххуыс кодтаиккам, уæд уый æххуыс уыдаид. Ахæм бон хъуамæ не ‘фсымæрты фарсмæ балæууæм», — загъта ныхасæмбал.

Хъуысаты Садреттин ракодта, гуманитарон уаргъ æрвитгæйæ минæварады минæвæрттæ кæй бавзæрстой, уыцы зындзинæдты кой. Хъахъхъæнынады фæрæзтæ рарвитыныл куыст цы бон райдыдтам, уымæй дыууæ боны раздæр Турчы рацыд закъон, æндæр бæстæтæм гуманитарон æххуыс æрвитæн кæй нæуал ис, уый тыххæй. Уæлбары тыххæй та хицауадмæ баздæхын хъуыд — фарстмæ сæрмагонд хуызы æркæсыны æмæ барлæвæрд раттыны тыххæй. Нæ тых æмæ амалæй архайдтам хъуыддаг кæронмæ ахæццæ кæныныл.

Нæ кадджын хистæртæй иуимæ — Хъаныхъуаты Шерифимæ аныхас кодтон, цæмæй нæм æввонггæнджытæ ссарыны хъуыддагæй фæкæса. Уый загъта, зæгъгæ, æфсымæрты ‘хсæн æхцайæн йæ кой дæр ма хъуамæ уа, æввонггæнджытæ йæхæдæг кæй ссардзæн æмæ алцыппæт дæр йæхи æхцайæ кæй балхæндзæн. Мæнæн та мæ бон уыд уаргъ бынатмæ фæхæццæ кæныны фæрстытæ аскъуыддзаг кæнын. Бацархайдтам, æнцон нæ уыд. Ныр дæр ма дис кæнæм, куыд бафæрæзтам æмæ нæ къухы куыд бафтыд, ууыл», — загъта диаспорæйы разамонæг.

Хъуысаты Садреттин ма уымæй уæлдай куыд фæбæрæг кодта, афтæмæй Турчы ирæтты ‘хсæн ныридæгæн коронавирусæй фæрынчыны иу цау дæр нæ уыд.

«Куыд зонын, афтæмæй ам ирæттæ иууылдæр æнæниз сты. Нæ зæрдæ дарæм, æввахс рæстæджы алцыппæт дæр кæй ахицæн уыдзæн, ууыл», — бафтыдта йæ ныхасмæ уый.